Converse жарнамасы неге дау тудырды?
Рая Мінап Converse компаниясының K-pop жұлдызы Карина түскен жарнамасы әлеуметтік желіде үлкен талқыға түсті. Компания кейін жарнаманы өшіріп, кешірім сұрады. Даудың себебі – кей қолданушылар суреттен АҚШ тарихындағы нәсілдік зорлық-зомбылыққа қатысты бейнелерді көрген. Бұл туралы Los Angeles Times жазды.
Жарнама Chuck 70 X аяқ киімін таныстыру үшін түсірілген. Threads-тегі кадрда aespa тобының мүшесі Карина ақ түсті киім киіп, қолына қара түсті Converse аяқ киімін ұстап тұр. Киімге түскен жарық үшбұрышқа ұқсас пішін қалыптастырған.
Осы көріністі кей қолданушылар Ku Klux Klan ұйымының үшкір бас киіміне ұқсатты. Ал Каринаның қолындағы аяқ киімнің төмен салбырап тұруын кейбірі АҚШ-тағы тарихи линчинг көріністерімен байланыстырды.
Бірақ, жарнама авторларының мұндай тарихи символиканы әдейі қолданғаны туралы дәлел жоқ. Кейбір қолданушылардың өзі мұны әдейі жасалған ишара емес деп санайды. Сондықтан, компанияның нақты қандай оймен бұл жарнаманы жасағанын кесіп айтуға болмайды.
Неліктен сурет көпшіліктің назарын аударды?
Жарнамадағы әрбір деталь көрерменге әртүрлі әсер етуі мүмкін. Бұл жағдайда киімнің түсі, жарықтың орналасуы және аяқ киімнің тұрысы кей адамдарға АҚШ тарихындағы ауыр оқиғаларды еске салған.
Әлеуметтік желідегі пікірталаста да негізгі сұрақ осы болды. Компания мұны әдейі жасады ма, әлде визуалды шешімнің осындай мағына беріп кететінін ешкім байқамады ма деген сұрақ туындады.
АҚШ-тағы азаматтық құқықтар жөніндегі адвокат Ли Мерритт компанияның кешірім сұрағанын айтып, мұндай мәселелер жарнама жарияланғаннан кейін емес, оны шығармай тұрып анықталуы керек деген пікір білдірді.
Converse кешірім сұрады
Қоғамдық сыннан кейін Converse жарнаманы өз әлеуметтік желілерінен алып тастады. Компания оны басқа платформалардан да жоюға қатысты жұмыс істеп жатқанын мәлімдеді.
«Біз кешірім сұраймыз. Бұл суреттің неліктен қатты реніш тудырғанын түсінеміз және қателескенімізді мойындаймыз. Біз суретті өз арналарымыздан алып тастадық және оның барлық жерде жойылуын қамтамасыз ету үшін жұмыс істеп жатырмыз. Бұлай болмауы керек еді және біз бұдан былай жақсырақ жұмыс істейміз», – деп келтіреді ABC News Converse мәлімдемесін.
Даудың екінші жағы
Жарнамадан кейін әлеуметтік желіде Converse өнімдерін бойкоттауға шақырған пікірлер де жазылды. Кей қолданушылар компания мұндай тарихи ассоциацияны жарнаманы жарияламас бұрын байқауы керек еді деп есептейді.
Ал басқа қолданушылар суреттің бастапқы мақсаты басқа болғанын және оны әдейі нәсілдік ишара ретінде жасағанына дәлел жоқ екенін айтты.
Сондықтан, бұл оқиғаны «Converse әдейі нәсілшіл жарнама жасады» деп біржақты айтуға негіз жоқ. Қазіргі таңда белгілі болғаны – жарнама әлеуметтік желіде сынға ұшырап, компания оны алып тастап, кешірім сұрады.
Бұл жағдай жарнамадағы бір ғана визуалды детальдың әр адамға әртүрлі мағына беруі мүмкін екенін көрсетті. Әсіресе, тарихи оқиғалармен байланысты символдар қолданылғанда, компаниялар жарнаманың аудиторияға қалай әсер етуі мүмкін екенін алдын ала ескеруі маңызды.
