Қазақстандықтардың кітапқа сұранысы 21% өсті
Рая МінапҚазақстанда соңғы жылдары кітапқа деген қызығушылық артып келеді. Дүниежүзілік кітап күніне орай Wildberries сарапшылары ел тұрғындарының талғамындағы өзгерістерді зерттеген. 2026 жылдың басынан сұраныс өткен жылмен салыстырғанда 21% өскен.
Жыл басынан бері әдебиетке деген қызығушылық тек көлем жағынан ғана емес, мазмұн жағынан да саналы түрде өскен. Оқырмандардың таңдауы жаппай жанрлардан философияға, классикалық шығармаларға және коллекциялық басылымдарға ауысқан.
Қазақстандықтар нені таңдайды
2026 жылы терең білімге деген сұраныс басым бола бастаған. Философиялық әдебиеттің сатылымы 86%, ал көркем шығармалардың сатылымы 65% өскен. Сонымен қатар оқырмандар өмірбаян кітаптарын 15% артық сатып ала бастаған. Балалар әдебиеті сегментіндегі сатылым 7% артқан.
Қазақ тіліндегі кітаптарға деген сұраныс та артып келеді. Бір жыл ішінде оған сұраныс 31% көбейген. Ел ішіндегі ең танымал кітаптардың қатарында білім беру әдебиеттері тұр. Сәуір айында қазақ тілі мен Қазақстан тарихы бойынша өз бетінше оқыту кітаптарына сұраныс айтарлықтай өскен.
Абай Құнанбаевтың «Абай жолы» романы және Дулат Исабековтың «Гауһар тас», «Сүйекші» повестерi сияқты мәңгілік классикалар, балаларға арналған қазақ тіліндегі ертегілер жинақтары мен танымдық әдебиеттер сұранысқа ие болған.
Қазақстандық шығармаларға шетелде сұраныс артқан
Сонымен қатар, қазақстандық басылымдарға шетелде сұраныс артты. Танымал қазақстандық авторлардың шығармалары мен Қазақстан мәдениеті туралы кітаптар Wildberries сатып алушылары арасында жоғары сұранысқа ие болған.
Қырғызстанда сатылым 3,5 есе (+250%) өскен. Ең көп сұранысқа ие кітаптар – Абай Құнанбаевтың «Қара сөздері» және Әзілхан Нұршайыховтың «Махаббат, қызық мол жылдар» шығармалары.
Өзбекстанда қазақ классиктерін оқитындар саны бір жылда 167% артқан. Ең танымал кітаптардың бірі Дулат Исабековтың «Гауһар тасы».
Ресейде оқырмандар қазақ ою-өрнектерінің этнографиялық атластарын және қазақ халқының тарихына арналған сыйлық басылымдарын таңдайды.
Арменияда әлемдік авторлардың қазақ тіліне аударылған шығармалары сатылып жатыр. Мысалы, Орхан Памуктың «Үнсіз үй» кітабын көп сатып алып жатыр.
Егер 2025 жылы сатып алынған қымбат кітаптардың қатарында энциклопедиялар мен тарихи жинақтар көш бастаса, 2026 жылы қазақстандықтардың таңдауы сирек әрі мәртебелі басылымдарға ауысқан.
Сәуір айында сатып алынған ең қымбат кітаптардың қатарында «Бусидо. Самурайлардың ар-намыс кодексі» эксклюзивті былғары мұқабадағы кітабы, профессор Сергей Дворецкийдің кеуде қуысы хирургиясына арналған 752 беттік іргелі еңбегі, әлемнің 134 валютасының коллекциясын қамтитын «Әлемнің барлық ақшасы» кітабы, Михаил Лермонтовтың шығармаларының сыйлық ретінде шығарылған басылымы және «Тақтар ойыны» дастаны болған.
