Қазақстанда мектеп оқушыларын каникул кезінде сабаққа қатысуға мәжбүрлей ала ма?

Қазақстанда мектептер каникул кезінде оқушыларға қосымша іс-шаралар ұйымдастыра алады. Алайда мұндай шараларға қатысу ерікті болуы керек. Оқу-ағарту министрлігі ата-аналар мен балалардың қалауы ескерілуге тиіс екенін ескертті.

Каникул кезінде мектепке бару міндетті ме?

Министрліктің түсіндіруінше, демалыс күндері мектептер балалардың бос уақытын тиімді өткізуіне арналған іс-шаралар ұсына алады. Бірақ оқушылардың оларға қатысуы міндетті емес. Ұйымдастыру кезінде балалардың қызығушылығы мен отбасының жоспары ескерілуі керек.

Сонымен қатар мұндай іс-шаралар мұғалімдерге қосымша әкімшілік жүктеме түсіріп,  есептілікті көбейтпеуге тиіс.

Мектеп әкімшілігі демалыс кезіндегі іс-шараларға жауапты адамдарды алдын ала белгілеп, балалардың қауіпсіздігін қамтамасыз етуі қажет. Ал мектептен тыс жерде өтетін шараларға оқушылар қатысқан жағдайда, оларды ересектер алып жүруге тиіс.

Оқушылардың каникулы заңмен қалай реттеледі?

Қазақстанда оқу жылының мерзімі мен каникул кезеңдері Оқу-ағарту министрлігінің бұйрығымен белгіленеді. 2026–2027 оқу жылына арналған ресми кестеге сәйкес, күзгі демалыс 26 қазаннан 1 қарашаға дейін жалғасады. Сабақ 2 қарашада қайта басталады.

Қысқы демалыс 2026 жылғы 28 желтоқсаннан 2027 жылғы 10 қаңтарға дейін, ал көктемгі демалыс 22–28 наурыз аралығында өтеді. 

Бұдан бөлек, мемлекеттік жалпыға міндетті білім беру стандартында бастауыш, негізгі орта және жалпы орта білім беру деңгейлеріндегі оқу жылының ұзақтығы мен каникул мерзімдеріне қойылатын талаптар белгіленген. Нормативтік құжатпен «Әділет» құқықтық ақпарат жүйесінен танысуға болады.

Егер мектеп каникул кезінде міндетті түрде келуді талап етсе, не істеу керек?

Егер мектеп әкімшілігі демалыс кезінде қосымша сабаққа немесе басқа іс-шараға міндетті түрде қатысуды талап етсе, ата-ана оның қандай нормативтік құжатқа негізделгенін сұрай алады.

Мәселе шешілмеген жағдайда, алдымен мектеп директорына, кейін жергілікті білім басқармасына немесе білім саласында сапаны қамтамасыз ету департаментіне жүгінуге болады.

Бір сөзбен айтқанда, каникул кезінде балаларға арналған қосымша іс-шаралар өткізуге болады. Алайда, министрліктің түсіндіруінше, демалыс бағдарламаларына қатысу ерікті болуы керек. Ал міндетті сабақтар туралы айтылса, мектептің нақты қандай шараны талап етіп отырғанын және оның қаншалықты заңды екенін анықтау керек.

Бұған дейін Қазақстан мектептерінде баға қоюдың жаңа ережелері енгізілгенін жазған едік.