Жас сайлаушылар лигасы Құрылтай сайлауына бақылаушыларды тіркеуде
Дәулет СаханЖас сайлаушылар лигасы 2026 жылғы 23 тамызда өтетін Құрылтай сайлауына тәуелсіз бақылаушыларды тіркеу басталғанын жариялады. Ұйымның мәліметінше, бақылау науқанына Қазақстанның кез келген өңірінен жастар қатыса алады. Қазіргі уақытта үміткерлерден өтінім қабылдау жүріп жатыр. Толығырақ Youth.kz материалында.
Ұйым өкілдерінің айтуынша, бақылаушылардың негізгі міндеті – сайлау учаскесінде дауыс беру процесінің заң талаптарына сәйкес өтуін бақылау. Олар сайлауға дайындық кезеңінен бастап, дауыс беру, бюллетеньдерді санау және қорытынды хаттамаларды рәсімдеу сияқты рәсімдерді бақылай алады.
Қоғамдық бақылау заң бұзушылықтардың алдын алуға және сайлау рәсімдерінің ашықтығын қамтамасыз етуге ықпал етеді. Бақылаушылар сайлау комиссияларының қызметіне араласпаса да, бірақ заңда көзделген құқықтары шеңберінде процесті қадағалап, қажет болған жағдайда анықталған жайттарды тіркей алады.
Бақылаушы болуға қойылатын талаптар алдын ала белгіленген. Үміткерлердің жасы 18 бен 35 аралығында болуы тиіс. Сонымен қатар олар Қазақстан Республикасының резиденті болуы, Жас сайлаушылар лигасы ұйымдастыратын оқу бағдарламасынан өтіп, оны растайтын сертификат алуы қажет. Бұдан бөлек, ұйым аясында сайлауды бақылау тәжірибесінің болуы талап етіледі.
Ұйымның хабарлауынша, бақылаушыларды еліміздің кез келген елді мекенінен тарту жоспарланып отыр. Бұл әртүрлі өңірлердегі сайлау учаскелерін қамтуға мүмкіндік береді.
Сайлауды қоғамдық бақылау Қазақстанда бірнеше жылдан бері азаматтық ұйымдардың қатысуымен жүзеге асырылып келеді. Мұндай бастамалардың мақсаты – сайлау процесінің жариялылығын арттыру және азаматтардың сайлау институтына деген қызығушылығын дамыту. Сонымен бірге бақылаушылардың құқықтары мен міндеттері ұлттық заңнамада және сайлауды өткізу тәртібін реттейтін нормативтік құжаттарда айқындалған.
Жас сайлаушылар лигасы бақылаушыларды vibory.kz платформасы арқылы тіркеп жатыр. Сондай-ақ ұйым тәуелсіз сайлауды бақылау бағдарламасын қолдауға арналған қайырымдылық жинағының жалғасып жатқанын хабарлады. Жиналған қаражат бақылаушыларды даярлау және олардың жұмысына қажетті ұйымдастырушылық шығындарды жабуға бағытталады.
Құрылтай сайлауы 2026 жылғы 23 тамызда өтеді. Оған дейін ұйым бақылаушыларды іріктеу жұмыстарын аяқтап, оларды сайлау учаскелеріне бөлуді жоспарлап отыр.
