Жануарларды қорлаған өзбекстандық блогер елден кетіп қалды
Дәулет СаханБұған дейін жануарларға қатыгездік көрсетілген бейнероликтер арқылы танылған өзбекстандық блогердің Өзбекстаннан кетіп, Түркияға бағыт алғаны туралы ақпарат тарады. Бұл туралы 14 тамызда unsiz.media Threads әлеуметтік желісінде хабарлады. Youth.kz жағдайды зерттеп, жануарларға қаншалықты жиі қорлық жасалатынын түсінуді шешті.
Андижандық блогер жануарларға қатысты видеоларымен сынға қалды
Блогердің аты-жөні әзірге ашық әрі сенімді дереккөздерде көрсетілмегендіктен, оны тек «Андижандық блогер» деп атаймыз.
Андижандық блогер әлеуметтік желілерде жануарларға қатыгездік көрсетілген видеоларды жариялағаннан кейін қоғамның наразылығына тап болды. Оның парақшасында шамамен 37 мың жазылушы болған. Өзбекстандық бірнеше медиа оның жануарларға қатысты мұндай контентті алғаш рет түсірмегенін жазды.
Ең көп талқыланған видеоның бірінде блогер мысықты биік қоршаудан асырып, құрылыс жүріп жатқан аумаққа лақтырып жібереді. Осыдан кейін ол камераға қарап күледі де, мысықтың бірнеше өмірі бар екенін айтып, «40 өмірдің біреуін алдым, тағы 39-ы қалды» деген сөзді айтады. Видео әлеуметтік желілерде тез тарап, қолданушылардың наразылығын туғызды.
Anhor аймақтық Ішкі істер департаментіне сілтеме жасап, 30 шілдеде блогердің жануарға қатыгездік көрсеткені үшін 4,1 миллион сум көлемінде айыппұл төлейтінін хабарлады. Блогердің бұл әрекеті «контент үшін» жасалғаны туралы ақпарат тарады. Басылым оның кешірім сұрағанын да жазды.
Оқиғадан кейін блогер видеоны өшіріп, парақшасындағы басқа материалдардың бір бөлігін де жойған.
Кейін unsiz.media оның Өзбекстаннан кетіп, Түркияға барғанын хабарлады. Алайда блогердің елден нақты қашан және қандай себеппен кеткені туралы ресми түсініктеме жарияланған жоқ.
Қазақстанда жануарларға қатыгездік көрсетуге қандай жаза бар?
Өзбекстандық блогердің жануарларға қатысты видеолары Қазақстандағы жағдайларды да еске түсіреді. 2026 жылы Қазақстанда да жануарларға қатыгездік көрсетуге байланысты бірнеше резонансты жағдай тіркелді.
Orda.kz ақпан айында Абай облысында шамамен 10 мысық пен марғауды Семей маңындағы тас жолға апарып, қораптар мен байланған қаптардың ішінде тастап кеткен. Бес марғау қырылып қалған, ал тірі қалған жануарлар панажайға жеткізілді. Полиция оқиға бойынша іс қозғап, жануарларды кім және не үшін тастағанын анықтай бастаған.
Тағы бір жағдай сәуір айында Семейдегі биоорталықта болған. Orda.kz хабарлауынша, ер адамдар балалардың көзінше арыстан ұсталатын қоршауға тас лақтырған. Биоорталық әкімшілігі мұндай әрекеттердің жиілеп кеткенін айтып, жануарларға тас, таяқ және басқа заттарды лақтыру қатыгездік болып саналатынын ескертті.
Ал bes.media 2026 жылы бұл бағыттағы жазалар күшейтілетіні жайлы хабарлады. Жануардың жарақат алуына әкелген қатыгездік үшін жеке тұлғаларға салынатын айыппұл 150 АЕК-ке дейін, яғни 648 мың теңгеге дейін өсті. Сонымен қатар қоғамдық жұмыстардың көлемі 150 сағатқа дейін, ал әкімшілік қамау мерзімі 40 тәулікке дейін ұлғайтылды.
Егер жануарға қатыгездік көрсету әрекетінде қылмыстық құқық бұзушылық белгілері болмаса, әкімшілік жауапкершілік қолданылады. 2026 жылғы өзгерістерден кейін жеке тұлғалар үшін айыппұл 30 АЕК-ке дейін, яғни 129 мың теңгеге дейін жетуі мүмкін. Құқық бұзушылық қайталанған жағдайда жаза да қатаңдайды.
Ал жануардың өліміне немесе ауыр зардаптарға әкелген әрекеттер қылмыстық жауапкершілікке жатуы мүмкін. Бұл Қазақстан Қылмыстық кодексінің 316-бабында – «Жануарларға қатыгездікпен қарау» бабында қарастырылған.
