Порноға тәуелділік бар ма?
Редакция Порнография миды бұзады, мастурбация зиян, ал жыныстық қатынастан немесе мастурбациядан бас тарту адамды күштірек етеді.Мұндай мәлімдемелерді әлеуметтік желілерден жиі көруге болады. Алайда ғылыми деректер оларды әрдайым растай бермейді. Биолог әрі ғылымды насихаттаушы Александр Панчин өзінің YouTube арнасындағы жаңа видеосында ең көп таралған мифтерді талдап шықты. Youth.kz сарапшының негізгі қорытындыларын ұсынады.
Панчин бірден өзінің мақсаты көрермендерді порнодан бас тартуға көндіру немесе, керісінше, оны ақтау емес екенін айтады. Оның сөзінше, моральдық бағалауды ғылыми фактілерден ажырата білу маңызды.
«Біздің міндетіміз – ненің жақсы, ненің жаман екенін айту емес. Біз моралист болмаймыз. Біз бұл құбылыстардың пайдасы немесе зияны туралы құрғақ, салмақты әрі қызықты фактілерді қарастырамыз. Ал қорытындыны өздеріңіз шығарасыздар», – деп түсіндірді Панчин.
Биологтың айтуынша, сексуалдық сипаттағы бейнелерге қызығушылықты табиғатқа қайшы нәрсе деп санауға болмайды. Ол мұндай мінез-құлық адамдарға жақын жануарларға да тән екенін көрсететін зерттеулерге сүйенеді.
«Мұндай сигналдарға қызығушылық – әбден табиғи нәрсе, ол табиғаттың өзінен берілген және гормондар арқылы реттеледі», – деді сарапшы.
Панчин «порноға тәуелділік» тақырыбына да ерекше тоқталды. Ол қазіргі психиатрияда, соның ішінде америкалық DSM-5 анықтамалығында мұндай диагноз жоқ екенін атап өтті. Кейде зерттеушілер «порнографияны проблемалы пайдалану» терминін қолданады, алайда ол ресми ауру ретінде танылмаған.
Сонымен қатар, порнография көру шын мәнінде күрделі мәселенің бір бөлігіне айналатын жағдайлар да кездеседі.
«Егер сіз порнография көрмей тұра алмайтын деңгейге жетсеңіз, сіз бұдан зардап шегіп, өзіңізді тоқтата алмасаңыз, онда сізде расында проблема бар. Оның үстіне, ол тіпті органикалық сипатта болуы мүмкін», – деді Панчин.
Кең таралған тағы бір миф – порно «миды бұзады» деген пікір. Панчиннің айтуынша, бұл идеяны қолдаушылар сілтеме жасайтын көптеген жарияланымдар тек статистикалық байланыстарды ғана көрсетеді және олардың негізінде себеп-салдары туралы қорытынды жасауға болмайды.
«Корреляция себеп-салдар байланысын білдірмейді», – дейді биолог.
Блогердің айтуынша, қазіргі таңда порнография көрудің миға ұзақ мерзімде қатты әсер ететінін сенімді түрде дәлелдейтін зерттеулер жоқ.
Мастурбация туралы айтқанда, Панчин қазіргі ғылыми деректер оның зияны туралы кең таралған мифтерді растамайтынын айтты. Керісінше, кейбір зерттеулер оның денсаулыққа пайдасы болуы мүмкін екенін көрсетеді.
Ол ер адамдардың айына шамамен 21 рет эякуляция жасаған жағдайда, қуықасты безі обырына сирек ұшырайтынын көрсеткен ірі зерттеуді еске салды. Бұл көрсеткіш эякуляция әлдеқайда сирек болған ер адамдармен салыстырғанда шамамен 20 пайызға төмен болған.
Сондай-ақ, биологтың айтуынша, мастурбация сексологияда терапияның бір бөлігі ретінде қолданылады және адамдарға өз денесін жақсырақ тануға көмектеседі.
Панчин жарыстар алдында жыныстық қатынастан немесе мастурбациядан бас тарту спорттық нәтижелерді жақсартады деген кең таралған пікірді де айналып өткен жоқ. Ол мұндай артықшылықтарды анықтамаған рандомизацияланған зерттеулерге сілтеме жасады.
«Ұрық сіздің спорттық күшіңіздің көзі емес, ал секс оны алып қоймайды», – деді Панчин.
Сөз соңында биолог порно мен мастурбация тақырыбының айналасында коммерцияның жиі құрылатынына назар аударды. Оның пікірінше, кейбір блогерлер мен түрлі курстардың авторлары алдымен адамдарды өздерінде ауыр проблема бар екеніне сендіріп, кейін сол «ауруды» емдеудің жолдарын сатады.
«Өзіңізге жалған диагноз қоймаңыз», – деді Панчин.
Қорытындылай келе, ғылымды насихаттаушы порнография көруге қалай қарау керектігін түсіндірді.
«Мен порнография мен мастурбацияға фастфуд сияқты қарауды ұсынамын. Кейде өзіңізге рұқсат беруге болады, бірақ егер тек сонымен ғана «қоректенсеңіз», уақыт өте келе үйдегі тамақтың дәмі сезілмей қалуы мүмкін», – деп түйіндеді биолог.
