Қазақстанның белгілі блогерлері қалай танылды?

Қазақстандық блогинг соңғы он жылда түбегейлі өзгерді. Бір кездері Instagram-дағы қысқа әзіл видеоларымен танылған вайнерлер бүгінде TikTok, YouTube және Instagram арқылы миллиондаған аудитория жинаған контент авторларына айналған. Қазақстандық блогерлердің жолы да әртүрлі. Бірі әлеуметтік желіні мектеп кезінен хобби ретінде бастаса, енді бірі медиаменеджмент немесе басқа салада білім алып, кейін контент индустриясына келген. Кейбірі блогингтен бизнеске, продюсерлікке немесе киноға ауысты.

Алина Ким – мектептегі видеолардан әлемдік TikTok-қа дейін

Алина Ким көпшілікке Homa деген лақап атымен белгілі. Ол әлеуметтік желіге алғашқы видеосын 2018 жылдың желтоқсанында, мектепте оқып жүрген кезінде жариялаған. Бастапқы контенті би мен танымал әуендерге түсірілген қысқа видеолардан тұрды. Кейін оның өзіндік стилі, әзілге құрылған шағын скетчтері мен эмоциялық реакциялары қалыптасты. 

2020 жылы Ким YOLO House TikTok-жобасына қосылып, қысқа уақытта оның ең танымал қатысушыларының біріне айналды. 2022 жылы жобадан кетіп, жеке шығармашылығын жалғастырды. Ол сол кезеңде Қазақстандағы ең көп жазылушысы бар TikTok авторларының бірі болған.

Бүгінде Алина Кимнің қызметі тек әлеуметтік желімен шектелмейді. Ол кино мен тележобаларға да қатысады. Мысалы, 2024 жылы Disney/Pixar-дың «Головоломка 2» мультфильмінің орыс тіліндегі дубляжында Зависть кейіпкеріне дауыс бергені туралы деректер бар. Оның жолы блогингтің жеке брендті шоу-бизнеске алып келетінін көрсетеді.

Бексұлтан Қазыбек – вайнерден продюсерге

Бексұлтан Қазыбек Қазақстандағы алғашқы танымал вайнерлер буынына жатады. Ол 2014-2020 жылдары Jokeasses шығармашылық бірлестігінің құрамында болды. Бұл жоба қазақстандық интернеттегі қысқа әзіл видеолардың танымал болуына ықпал еткен топтардың бірі еді. Қазыбек Алматыдағы гимназияда оқып, кейін Қазақстан менеджмент, экономика және болжау университетін медиаменеджер мамандығы бойынша тәмамдаған.

Оның блогингтегі ең маңызды кезеңдерінің бірі 2020 жыл болды. Сол жылы ол TikTok бағытындағы BIP House және YOLO House жобаларының бас продюсері атанды. Осылайша өзі кадр алдындағы блогерден контент авторларын біріктіретін продюсерге айналды. Бұл туралы Forbes Kazakhstan да жазған.

Қазыбектің мысалы Қазақстандағы блогингтің эволюциясын жақсы көрсетеді. Алғашқы кезеңде басты тұлға экрандағы вайнер болса, кейін оның артындағы продюсер, команда және бизнес-модель маңызды бола бастады.

Дастан Мұхамедрахым – мұғалімнен travel-блогерге

Қазақстандағы блогингтің тағы бір бағыты – елдің табиғаты мен саяхатты көрсету. Дастан Мұхамедрахым осы бағытта танылған контент авторларының бірі.

Ол блогингке бірден кәсіби маман ретінде келген жоқ. Бұған дейін қазақ тілі мұғалімі болып жұмыс істеген. Кейін камераға қызығушылығы артып, Қазақстанның табиғаты, қалалары мен туристік орындары туралы видео түсіре бастаған. Оның контенті біртіндеп әлеуметтік желідегі аудиториясын кеңейтті. 

2026 жылы Мұхамедрахым үшін халықаралық деңгейдегі маңызды кезең болды. Ол Канндағы WIBA Awards 2026 байқауында «Best Travel Blogger 2026» номинациясын жеңіп алды. 

Дастанның өмір жолы блогер болу үшін міндетті түрде бала кезден камера алдында жүру қажет емес екенін көрсетеді. Негізгі мамандығын сақтай отырып, жаңа бағытты меңгеріп, оны жеке брендке айналдыруға болады.

Zheka Fatbelly –  вайнерліктен бизнеске

Қазақстандағы алғашқы вайнерлер дәуірін Жеңіс Омаров, яғни Zheka Fatbelly есімінсіз елестету қиын. Ол қысқа әзіл видеолары арқылы кең аудитория жинаған блогерлердің бірі болды.

Оның танымал болуы Instagram-дағы қысқа форматтың қарқынды дамыған кезеңімен тұспа-тұс келді. Вайнерлер күнделікті өмірдегі жағдайларды әзілге айналдырып, үлкен аудиторияға тез жетті. Қазақстандық блогерлер туралы шолуларда Zheka Fatbelly сол кезеңдегі Instagram-инфлюенсерлердің қатарында аталады. 

Бүгінде блогерлердің бір бөлігі контенттен бөлек кәсіпкерлікке бет бұрды. Zheka Fatbelly де осы үрдістің жарқын мысалы.

Аминка Витаминка – жасөспірімдер аудиториясынан жеке брендке

Аминка Витаминка да қазақстандық интернеттің алғашқы танымал вайнерлерінің бірі. Оның аудиториясы негізінен жасөспірімдер мен жастардан тұрады.

Ол тек жеке блог жүргізумен шектелмей, кейін продюсерлік жобалардың құрамына кірді. Forbes Kazakhstan материалында Аминка Витаминка «30-дан 30-ға дейін» рейтингіне енген блогер ретінде аталады. Сондай-ақ, Бексұлтан Қазыбектің оны продюсерлік жобаларының біріне қосқаны көрсетілген.

Бұл блогингтің тағы бір ерекшелігін көрсетеді.Танымал контент авторы уақыт өте келе өзі де медиажобаға немесе коммерциялық брендке айнала алады.

Блогер болу – енді жай хобби емес

Қазақстандағы танымал блогерлердің жолына қарап, бір ортақ заңдылықты байқауға болады.Олардың көпшілігі бастапқыда блогингті кәсіби мансап ретінде қарастырмаған.

Алина Ким әлеуметтік желіні мектеп оқушысы кезінде бастаған. Бексұлтан Қазыбек медиаменеджменттен кейін вайнерлікке келіп, продюсер болды. Дастан Мұхамедрахым мұғалімдік қызметтен travel-контентке ауысты.

Бұл мысалдар блогингтің Қазақстанда жеке мамандыққа жақын жеке индустрияға айналғанын көрсетеді. Бүгінде блогердің жұмысы тек видео түсірумен шектелмейді, аудиториямен байланыс, сценарий, монтаж, жарнама, жеке бренд, продюсерлік және коммерциялық жобалар да оның кәсібінің бір бөлігіне айналған.

Сондықтан, қазақстандық блогингтің эволюциясын бір сөйлеммен сипаттасақ, «телефонға түсірілген қысқа әзілден жеке медиа-бизнеске дейін» деген жолды көруге болады.