Қазақстан АПВ вакциналарының жаңа партиясын сатып алды

Қазақстан адам папилломасы вирусына (АПВ) қарсы «Гардасил-9» вакцинасының 250 мыңға жуық дозасын сатып алды. Бұл препарат вирустың тоғыз түрінен қорғайды, оның ішінде жатыр мойны обыры мен басқа да онкологиялық аурулардың дамуына жиі себеп болатын түрлері бар. Жаңа вакцина «Гардасил-4» қоры толық таусылғаннан кейін қолданыла бастайды, деп хабарлайды Youth.kz.

Қазақстанға 250 мыңға жуық доза жеткізіледі

«СК-Фармация» бірыңғай дистрибьюторының мәліметінше, 2026 жылға 249 952 доза «Гардасил-9» вакцинасы сатып алынған, деп жазады Tengri Health. 

Алғашқы 155 589 дозадан тұратын партия Қазақстанға маусым айында жеткізілді. Оның бір бөлігі өңірлерге жөнелтілсе, қалғаны тамыз айында таратылмақ.

Екінші партия – 94 мың доза қазан айында келеді деп күтілуде. Бұл вакциналар қараша айында өңірлерге жеткізіледі.

«Гардасил-9» адам папилломасы вирусының 6, 11, 16, 18, 31, 33, 45, 52 және 58 типтерінен қорғайды. Олардың кейбірі жатыр мойны обыры мен басқа да онкологиялық аурулардың дамуына себеп болуы мүмкін.

Бұған дейін қандай вакцина қолданылды?

Қазақстанда АПВ-ға қарсы вакцинация 2024 жылдың қыркүйегінен бастап жүргізіледі. Ол Ұлттық профилактикалық екпелер күнтізбесіне енгізілген және тек ата-анасының немесе заңды өкілінің келісімімен салынады.

Осы уақытқа дейін елімізде «Гардасил-4» вакцинасы қолданылып келді. Ол АПВ-ның 6, 11, 16 және 18 типтерінен қорғайды.

Қазір Қазақстанда «Гардасил-4» вакцинасының шамамен 126 мың дозасы сақтаулы тұр. Жаңа вакцина осы қор толық пайдаланылғаннан кейін ғана енгізіледі. Бұл вакцинацияның үзіліссіз жалғасуына мүмкіндік береді.

Жаңа вакцинаны кімдер тегін алады?

«Гардасил-9» вакцинасына көшкеннен кейін тегін екпе:

• 11 жастағы қыздарға – жоспарлы түрде;
• 12-13 жастағы қыздарға – қуып жету вакцинациясы аясында жүргізіледі.

Толық иммунитет қалыптастыру үшін екі доза қажет.

Сонымен қатар, 2026 жылдың мамырынан бастап екпені 14-17 жас аралығындағы қыздар да ала алады. Алайда, жаңа вакцинаның бұл жас тобына қолжетімді болуы жөнінде түпкілікті шешім әзірге қабылданған жоқ.

Қанша қыз бала екпе алды?

Ұлттық қоғамдық денсаулық сақтау орталығының мәліметінше, 2026 жылдың шілде айының басындағы жағдай бойынша Қазақстанда АПВ-ға қарсы 482 мыңға жуық екпе салынған.

Бірінші дозаны:

• 11-13 жастағы шамамен 265 мың қыз;
• 14-17 жастағы шамамен 42 мың қыз алған.

Екінші дозаны 11-13 жас аралығындағы 175 мыңға жуық қыз қабылдаған.

Айта кетейік, адам папилломасы вирусының 200-ден астам түрі бар. Оның шамамен 40 түрі жыныстық жолмен жұғады, ал кейбірі жатыр мойны обыры мен басқа да аурулардың дамуына себеп болуы мүмкін. Вакцинация қауіпті вирус түрлерін жұқтырмай тұрып, ағзаны олардан қорғауға мүмкіндік береді.