Плюш орангутан - ең жақын досы: Жапониядағы Панчтың хикаясы желіні тебірентті!

Бұл демалыс күндері әлеуметтік желілердің басты кейіпкеріне айналған – Жапониядағы Панч есімді кіп-кішкентай маймыл. Алты айлық сәбидің плюш ойыншыққа деген ерекше махаббаты мыңдаған адамның жүрегін елжіретіп, видеолар бір сәтте-ақ виралға айналды. Бірақ бұл жай ғана «мимими» контент емес. Бұл – жалғыздық, бейімделу және мейірім туралы хикая.

Анасының «суықтығы» және зообақ қызметкерлерінің жедел көмегі

Панч 2025 жылдың шілдесінде Жапонияның Итикава қаласындағы зообақта дүниеге келген. Алайда өмірінің алғашқы күндері оңай болмады: анасы одан бас тартып, күтім көрсетпеген.

Зообақ қызметкерлерінің айтуынша, анасы сәбиге қасақана зиян келтірмеген. Дегенмен, ол оны қабылдамай, қараусыз қалдырған. Осындай жағдайда мамандар уақыт жоғалтпай, бірден араласып, Панчты жасанды тамақтандыруға көшіріп, тәулік бойы бақылауға алған.

Қазір анасы зообақтағы өз тобында өмір сүруін жалғастырып жатыр. Оны бөлек оқшаулау немесе «жазалау» тәжірибесі қолданылмайды. Себебі мамандар мұны жануарлар әлемінде кездесетін табиғи мінез-құлықтың бір көрінісі деп түсіндіреді.

Кішкентай Панч жалғызсырамасын деп қызметкерлер оған көрпешелер мен жұмсақ ойыншықтар берген. Бірақ ол бәрінің ішінен бір плюш орангутанды таңдап алады. Сол сәттен бастап ойыншық оның ең жақын «досына» айналған.

Панч плюш орангутанын құшақтап ұйықтайды, қайда барса да өзімен бірге сүйреп жүреді. Егер жанында басқа маймылдар пайда болса, ойыншығын қаттырақ қысып алады екен. Мамандардың айтуынша, бұл – қауіпсіздік сезімін іздеудің табиғи тәсілі.

«Жалғыздық аяқталды»

Жақында тараған видеода Панчтың өзінен үлкен маймылға қалай еркелеп, оны жібергісі келмей құшақтап жатқанын көруге болады.

Оның жанарындағы қорқыныштың орнын тыныштық басқан. Панч өзіне өте қажет болған қорғанды тапты. Ол енді жалғыз емес.

«Бұл көрініске күлімсіремей қарау мүмкін емес. Кейде бақытты болу үшін тек қана қасыңда болатын, сені түсінетін жан керек», – деп жазады желі қолданушылары.

Бұл тек жануарлар туралы видео емес. Бұл – мейірімділік пен мұқтаждық туралы хикая. Панчтың оқиғасы бізге қарапайым ғана құшақтың қаншалықты құдыретті екенін тағы бір мәрте еске салды. 

Пайдаланушылар пікірлерінде:

«Жүрегім езіліп кетті, оны құшақтап алғым келеді!»

«Бұл әлемге дәл Панч сияқты таза махаббат жетіспейді…», – деп жазуда.

Бұл – жай ғана жануар туралы әсерлі видео емес. Бұл – мейірім мен мұқтаждық туралы хикая. Панчтың тарихы бізге қарапайым ғана ақиқатты еске салды: Кейде ең үлкен ем – жанымыздағы жылу мен түсіністік.

Кішкентай Панч бәрімізге нағыз достық пен қамқорлықтың қадірін тағы бір мәрте көрсетті.