Паша Кас Қырғызстандағы Путин шыңына плакатпен көтеріліп, соғысты тоқтатуды талап етті
Рая Мінап Қазақстандық суретші Паша Кас Қырғызстандағы «Путин шыңына» көтеріліп, «Останови свою войну» («Өз соғысыңды тоқтат») деген жазуы бар плакатпен жалғыз адамдық акция өткізді.Бұл туралы «ЗаНамиУжеВыехали» Instagram арнасы жазды.
Суретші бұл акцияны Ресей президенті Владимир Путиннің ШЫҰ саммитіне қатысу үшін Қырғызстанға келер алдында ұйымдастырған.
Паша Кас әлеуметтік желідегі жазбасында плакаттағы «СВОю» сөзіндегі «СВО» аббревиатурасын әдейі бөліп көрсеткенін жазды. Ресей билігі Украинадағы соғысты «арнайы әскери операция» деп атайды.
«Таудың етегінде, мыңдаған шақырым жерде бүгін де, кеше де, оның алдында да біреу оянбайды. Біреу жертөледе балаларын түгелдей санай алмайды», – деп жазды суретші.
Оның айтуынша, Путин бұл үндеуді көруі екіталай. Алайда бұл соғыс туралы айтудың қажеттілігін өзгертпейді.
«Шындықты бәрібір жазып қалдыру керек. Тіпті оны жылдар бойы оқитын ешкім болмаса да», – деді Паша Кас.
Паша Кас Көкжайлаудың құрылысына қарсы шықты: «Таулар – ресурс емес»
Қазақстандық суретші Паша Кас Алматыдағы Көкжайлау аумағын игеру жоспарына қарсылығын білдірді. Ол Instagram-дағы жазбасында табиғатты коммерциялық ресурс ретінде қарастыруға болмайтынын айтып, экоактивистерді қолдайтынын жеткізді.
Суретшінің пікірінше, билік пен бизнес табиғатқа көбіне тұтыну тұрғысынан қарайды. Ол Көкжайлау мәселесін мысалға келтіріп, табиғи аумақтың экономикалық пайда үшін пайдаланылуына сын айтты.
«Табиғат – ресторан емес. Оны сатып алуға болатын қызмет емес», – деп жазды Паша Кас.
Ол табиғи нысандардың құндылығын тек экономикалық пайдамен өлшеуге болмайтынын айтады. Суретшінің сөзінше, орманды кескеннен немесе табиғи экожүйені бұзғаннан кейін оны ақшаға бұрынғы қалпына келтіру мүмкін емес.
Паша Кас сонымен қатар «даму» ұғымына қатысты сұрақ көтерді. Оның пікірінше, даму тек жаңа нысандар салу немесе экономикалық өсіммен өлшенбеуі керек. Кей жағдайда табиғатты сақтау үшін белгілі бір жобадан бас тарта білу де даму болуы мүмкін.
«Мұнда құрылыс салуға болмайды. Таулар – ресурс емес. Олардың өз алдына өмір сүруге құқығы бар», – деп жазды ол.
Суретші Көкжайлауды қорғап жүрген экоактивистер мен табиғатты қорғаушыларға қолдау білдірді.
Оның бұл жазбасы Көкжайлау аумағында тау-шаңғы курортын салу мәселесі қайта талқыланып жатқан тұста жарияланды. Жобаға қатысты қоғамдық пікір екіге бөлінген. Оны қолдайтындар туризм инфрақұрылымын дамытудың экономикалық пайдасын алға тартса, қарсы тарап табиғи аумақ пен экожүйеге келетін ықтимал зиянға алаңдайды.
Паша Кастың Көкжайлау туралы жұмысы оның өнерді қоғамдық және экологиялық мәселелерді көтерудің құралы ретінде пайдаланатынын тағы көрсетті.
