8 наурызға қандай сыйлықтарды беруге болмайды?

Халықаралық әйелдер күні - өміріңіздегі ең қымбат, ең маңызды әйелдерге жүрек түкпіріндегі сезімдеріңізді тағы бір мәрте шынайы түрде жеткізетін ерекше мүмкіндік. Алайда кейде дәл осы күні кейбір ер азаматтар таба немесе «диеталық ғажайып» таблетка сыйлап үлгереді.

Сондықтан қай сыйлықтарды мүлде ойдан шығарған дұрыс екенін бірге саралап көрейік.

Оған емес, өзіңізге ұнайтын сыйлық

Тек сізді қызықтыратын футбол матчының билеттері. Өзіңіз ғана ойнайтын ойын консолі. Сырттан қарағанда сыйлық жасағандай көрінесіз, ал шын мәнінде сіз тек өзіңізді қуантып тұрсыз.

Не сыйлауға болады:

• Оның сүйікті әртісінің концертіне билет.
• SPA-процедураға сертификат.
• Оның армандап жүрген шеберлік сабағына жолдама (сурет, керамика, вокал).

«Өзгерсең екен, жаным» деген астары бар сыйлықтар

8 наурызда «Қалай мінсіз әйел болуға болады», «Әйелдік 2.0» немесе «Кама-сутра» секілді кітаптар екі жақты әсер қалдыруы мүмкін. Мұндай сыйлықты біреу әзіл ретінде қабылдар, ал біреу оны «мені осындай күйімде қабылдамайды екен» деген оймен түсінуі ықтимал.

Ал астарлы ой көбіне жүрекке тікелей сөзден де ауыр тиеді. Нәтижесінде мұндай таңдау жақын адамыңызды ренжітіп, қарым-қатынасқа салқындық әкелуі мүмкін.

Не сыйлауға болады:

• Оның сүйікті жанрындағы роман.
• Әдемі безендірілген жеке күнделік (ішіне жылы тілек жазып).
• Ортақ естеліктеріңізден құралған шағын фотоальбом.

«Болса болды» деген мәндегі кездейсоқ сувенир

Бұл қатарға қарапайым жазуы бар кружка, жақын маңдағы дүкеннен алынған мүсінше немесе ешқандай астарлы мағынасы жоқ ойыншық кіруі мүмкін.

Сіз жақын адамыңызды бұл сыйлықты күні бойы іздедім деп қанша жерден сендірсеңіз де, заттың өзі бар жағдайды айтып тұрады. 

Не сыйлауға болады:

• Оның есімі ойылып жазылған әшекей.
• Қолмен таңдалған гүл шоғы (оның сүйікті гүлінен).
• Хат + шағын, бірақ мағыналы сыйлық (мысалы, ерекше парфюм).
• Арықтауға арналған өнімдер немесе қартаюға қарсы «ғажайып құралдар».

Әжімге қарсы крем, спортзалға абонемент негізінде жаман сыйлықтар емес. Бірақ мұндай дүниелерді кез келген басқа күні де табыстауға болады ғой.

Ал 8 наурызда бұл таңдау оның сыртқы келбетіне жасырын сын секілді көрінуі мүмкін. Мереке күні сіз оған «өзгер» деген ойды лақтырмай, «осындай күйіңде әдемісің» деген сезімді білдіргеніңіз әлдеқайда дұрыс. 

Не сыйлауға болады:

• Сапалы күтім жиынтығы (оның ұнататын бренді).
• Демалыс күнін бірге өткізуге жоспарланған романтикалық кеш.

Контекстсіз конверттегі ақша

Кей жағдайда, егер бұл отбасылық дәстүр болса, мұндай сыйлық орынды көрінуі мүмкін. Алайда көп жағдайда ол «мен бұл мейрам жайлы ұмытып қалдым, тіпті ойланбадым да» деген әсер қалдырады.

Есте ұстаңыз: адамдар көбіне ақшаның өзін емес, сол сыйлықтың артындағы ықыласты бағалайды.

Не сыйлауға болады:

• Бірге саяхатқа уәде етілген сертификат (мысалы, тауға шығу немесе демалыс күнгі сапар).
• Оның арманына арналған нақты қадам (курстың төлемі, шығармашылық студияға жазылу).

Сыйлық тандағанда нені есте ұстау керек?

• Ол соңғы кезде не туралы жиі айтқанын.
• Оның күнделікті өмірінде не жетіспейтінін.
• Ол бір нәрсені армандап, бірақ «кейін аламын» деді ме?