Қазақстанда жалға берілетін электросамокаттарға жаңа талаптар енгізілді

Қазақстанда жалға берілетін электросамокаттарға мемлекеттік тіркеу нөмірлері беріле бастады. Сонымен қатар пайдаланушылар үшін міндетті сақтандыру енгізіліп, кикшеринг қызметтеріне қозғалыс жылдамдығы мен тұраққа қою тәртібін бақылау міндеттелді. Жол қозғалысы ережелеріне енгізілген өзгерістердің бір бөлігі күшіне енді.  25 тамыздан бастап электросамокат пайдаланушылардың күнделікті қозғалысына әсер ететін тағы бір маңызды талап қолданысқа енгізіледі, деп хабарлайды youth.kz.

1 шілдеден бастап не өзгерді?

Ішкі істер министрлігі баспасөз қызметінің YouTube-тегі арнасында хабарлағандай, басты жаңалық – жалға берілетін әрбір электросамокатты міндетті түрде тіркеу керек. Енді құрылғыда бірегей нөмір орналастырылуы тиіс. Сол нөмір арқылы камералар жүргізуші жол қозғалысы ережелерін бұзған жағдайда самокатты анықтай алады. Бұған дейін құқық бұзушылық тіркелгеннен кейін нақты құрылғыны анықтау іс жүзінде мүмкін болмаған.

Тағы бір маңызды талап – пайдаланушының азаматтық-құқықтық жауапкершілігін міндетті сақтандыру. Бұл жаяу жүргіншіге немесе қозғалыстың басқа қатысушысына зиян келтірілген жағдайда залал сақтандыру есебінен өтелетінін білдіреді.

Кикшеринг компанияларының жаңа міндеттері

Жалға беру қызметтерінің міндеттері көбейеді. Олар самокаттардың техникалық жарамдылығын қамтамасыз етуге, олардың жылдамдығы мен орналасқан жерін бақылауға, қозғалысы шектелген аймақтарда жылдамдықты автоматты түрде төмендетуге және ретсіз тұраққа қоюдың алдын алуға міндетті.

Бұдан бөлек, компаниялар барлық самокаттардың есебін жүргізуге және қажетті мәліметтерді ішкі істер органдарына беруге міндетті.

Егер пайдаланушының жүргізуші куәлігі болмаса, жалға беру қызметі оның электросамокатпен автомобиль жүретін жол бөлігіне шығу мүмкіндігін бұғаттауы тиіс.

Қай жерде жүруге болады?

Электросамокаттардың қозғалыс ережелері Жол қозғалысы ережесінің 168-1-тармағында бекітілген. Ең алдымен, электросамокат жүргізушілері велосипед жолдарын және велосипедке арналған жолақтарды пайдалануы тиіс. Егер мұндай инфрақұрылым болмаса, келесі жерлерде жүруге рұқсат етіледі:

• жолдың жүру бөлігінің оң жақ шетімен;
• жол жиегімен;
• тротуармен немесе жаяу жүргіншілер жолымен.

Алайда тротуарда қозғалу кезінде жылдамдық сағатына 6 шақырымнан аспауы тиіс. Сонымен қатар жүргізуші жаяу жүргіншілерге кедергі келтіріп, олардың қауіпсіздігіне қауіп төндірмеуі қажет.

25 тамыздан бастап не өзгереді?

Тамыз айының соңынан бастап талап одан әрі қатаңдатылады. Электросамокаттардың тротуарлар мен жаяу жүргіншілер жолымен жүруіне тыйым салынады.

Осы күннен кейін электросамокаттардың негізгі қозғалыс орны велосипед жолдары болады. Егер ондай жол болмаса, жолдың жүру бөлігінің оң жақ шетімен немесе жол жиегімен жүруге рұқсат етіледі.

Іс жүзінде бұл электросамокаттардың жаяу жүргіншілер аймағынан көлік инфрақұрылымына көшірілетінін білдіреді.

Жолдың жүру бөлігіне кім шыға алады?

Жолдың жүру бөлігімен қозғалуға бірнеше талап бір мезгілде орындалған жағдайда ғана рұқсат етіледі. Жүргізуші:

• 18 жастан асқан болуы;
• кез келген санаттағы жүргізуші куәлігі болуы;
• қорғаныс дулығасын киюі тиіс.

Осы талаптардың бірі орындалмаса, жолдың жүру бөлігіне шығуға тыйым салынады.

Не істеуге болмайды?

Ішкі істер министрлігі қолданыстағы шектеулерді де еске салды. Электросамокатпен:

• жолаушыларды немесе жүкті тасымалдауға;
• самокаттан түспей жаяу жүргіншілер өткелі арқылы жолды кесіп өтуге;
• қараңғы уақытта жарық шағылыстыратын элементтерсіз жолмен жүруге болмайды.

Жалпы, жаңа ережелер жалға берілетін электросамокаттарды пайдалануды толыққанды көлік құралына теңестіреді. Енді құрылғыны сәйкестендіру, міндетті сақтандыру, қызметтердің бақылауы және жүргізушілерге қойылатын қатаң талаптар енгізіледі.

Министрлік бұл өзгерістер жол-көлік оқиғаларының санын азайтып, электросамокат жүргізушілері мен жаяу жүргіншілер арасындағы келіспеушіліктерді азайтуға мүмкіндік береді деп есептейді.